Tsaang Gubat - mabisa sa sakit ng tiyan

Ang dahon ng Tsaang Gubat ay mabisang gamitin laban sa Sakit ng Tiyan (stomach ache)

Paraan ng paghahanda:

• Kumuha ng dahon, hugasang mabuti at pagkatapos ay tadtarin.
• Ilagay sa kaserola ang dalawang baso ng tubig at dalawang baso ng tinadtad na dahon
• Pakuluan ng 15 minuto gamit ang mahinang apoy, huwag tatakpan
• Palamigin at Salain

Dosis na Rekomendado ng DOH

• Kung ang ginamit ay sariwang dahon, 4 na kutsara sa matanda at 2 na kutsara sa edad 7 to 12
• Kung ang ginamit ay tuyong dahon, 3 kutsara sa matanda at 1 1/2 kutsara sa edad 7 to 12

Laging tandaan na ang pagkonsulta sa Doktor ay kinakailangan. Ang mga halamang gamot ay nakatutulong, ngunit may mga sakit na kailangan ng propesyunal na opinyon ng mga Dalubhasa.

Oregano - Mabisa sa Ubo at Sipon

OREGANO
Scientific name : Coleus Aromaticus
Ang oregano ay nakakatulong mapaginhawa ang katawan kapag may ubo, sipon, at lagnat. Maging sa sore throat, pigsa at pananakit ng kalamnan, UTI at sakit ng tiyan ay mabisa rin ito.

Paraan ng paggamit:
Ubo at Sipon - magpakulo ng isang tasa ng dahon ng oregano sa tatlong tasa ng tubig sa loob ng 10 hanggang 15 minuto at inumin. Maaari din ilagay sa ibabaw ng sinaing ang sariwang dahoon at kapag nag-iba na ang kulay nito ay pigain sa kutsara ang katas at direktang inumin.
Rayuma, pigsa, sugat at kagat ng insekto – dikdikin, pigain at ipahid ang katas ng dahon.

Pinaniniwalaang mga sakit na mabisa ang oregano:
1. Paso. Ginagamit ang dinikdik na dahon ng oregano upang maibsan ang pananakit ng paso sa balat.
2. Pananakit ng ulo. Ang dahon naman na bahagyang pinitpit ay inilalagay sa sentido para mabawasan ang pananakit ng ulo.
3. Kagat ng insekto. Ipinangtatapal din ang dahon na bahagyang dinikdik sa bahagi ng katawan na apektado ng kagat ng insekto, o tusok ng alupihan at alakdan.
4. Hika. Ang pinaglagaan ng dahon ng oregano ay mabisa rin para sa kondisyon ng hika.
5. Bagong panganak. Pinaiinom naman ng pinaglagaan ng dahon ng oregano ang mga bagong panganak.
6. Kabag. Mabisa rin para sa kondisyon ng kabag ang pag-inom sa pinaglagaan ng oregano.
7. Pigsa. Ang pigsa sa balat ay matutulungan naman ng pagtatapal ng dinikdik na dahon ng oregano.
8. Pananakit ng lalamunan dahil sa sore throat ay maaaring matulungan ng paglunok ng pinaglagaan ng pinatuyong dahon ng oregano.
9. Ubo. Ang ubo na mahirap gumaling at pabalik-balik ay maaaring matulungan ng pag-inom sa pinaglagaan ng oregano. Maaari ring lunukin ang isang kutsara ng katas nito.